LV-2017/102 - Gróðurstyrking við Hálslón og á Hraunum, Fljótsdalsheiði

Frá árinu 2009 hefur áburði verið dreift á gróðursnauð svæði austan Hálslóns svo koma megi upp gróðri sem gæti staðist og bundið hugsanlegt áfok úr lónstæði. Heildarstærð uppgræðslusvæðis þar er nú um 780 ha. Árangur hefur verið mjög góður flest árin. Vel hefur árað undanfarin tvö ár. Svæðin komu vel undan vetri og hægt var að hefja dreifingu seinnipart júní í ár. Áburður síðasta árs var einnig enn að verka framan af sumri. Árið 2012 hófst uppgræðsla með áburðargjöf og sáningu á Hraunum, röskuðum, fyrrum framkvæmdasvæðum. Svæðin eru almennt rýr, hátt yfir sjó og erfið í uppgræðslu. Sama gildir um önnur framkvæmdasvæði á Fljótsdalsheiði en hafist var að nýju við uppgræðslu á haugssvæði utarlega í Desjarárdal. Alls eru uppgræðslusvæðin við Hálslón, á Hraunum og við aðgöng 2 nú rúmlega 900 ha.